Ուկրաինայի՝ ՆԱՏՕ-ին անդամակցությունը ներկայում անհնար է համարվում

Եվրոպական հանձնակատար Անդրյուս Կուբիլյուսը հայտարարել է, որ Ուկրաինայի անդամակցությունը Հյուսիսատլանտյան դաշինքին այս փուլում անհնար է, իսկ Եվրամիությանը միանալու գործընթացը կարող է երկար ժամանակ պահանջել։ Այս մասին հայտնում է ուկրաինական «Հրոմադսկե» լրատվամիջոցը։

Կուբիլյուսի խոսքով՝ առավել արդյունավետ լուծում կարող է լինել եվրոպական պաշտպանական միության ստեղծումը, որը կմիավորի Ուկրաինայի, Մեծ Բրիտանիայի և Նորվեգիայի ռազմական ներուժը Եվրամիության երկրների հնարավորությունների հետ։ Նա նշել է, որ նման ձևաչափը թույլ կտա արագ զարգացնել պաշտպանական համագործակցությունը՝ առանց երկարատև անդամակցության գործընթացների սպասելու։

Միևնույն ժամանակ, նրա գնահատմամբ, առաջիկա տասը տարիների ընթացքում Եվրամիության երկրների ռազմական ծախսերը կարող են հասնել 6,8 տրիլիոն եվրոյի։ Կուբիլյուսը ընդգծել է, որ այս ծախսերը անհրաժեշտ են դաշինքի առաջ ստանձնած պարտավորությունները կատարելու համար, և նշել է, որ միշտ չէ, որ անհրաժեշտ է ձեռք բերել ամենաթանկ սպառազինությունը․ երբեմն բավարար են ավելի մատչելի, բայց նպատակին համապատասխան միջոցները։