Մարսը չի դառնա մարդկության «փրկության կետ»․ գիտնականը խոսել է սահմանափակումների մասին

Այսօր գոյություն ունեցող տեխնոլոգիաները թույլ չեն տալիս Մարսի վրա ստեղծել լիովին ինքնավար բազա, որը կարող էր դառնալ մարդկության փրկության տարբերակ Երկրի վրա աղետի դեպքում։ Այս մասին հայտնում է «ՌԻԱ Նովոստի»-ն՝ հղում անելով Ռուսաստանի գիտությունների ակադեմիայի բժշկա-կենսաբանական խնդիրների ինստիտուտի գիտնական Վլադիմիր Սիչովի գնահատականին։

Գիտնականի խոսքով՝ անգամ տեխնիկական առաջընթացի պայմաններում մարդկության տեղափոխումը Մարս չափազանց բարդ խնդիր է։ Նա նշել է, որ դրա համար անհրաժեշտ է ստեղծել ամբողջությամբ փակ կենսաբանական համակարգ, ինչը ներկայիս տեխնոլոգիական մակարդակով անհնար է։ Սիչովը նաև ընդգծել է, որ առաջին բնակիչները կախված կլինեն Երկրից մատակարարվող ռեսուրսներից։

Բացի այդ, նրա խոսքով՝ մինչ այժմ լուծված չէ նաև Մարսի վրա ճառագայթումից պաշտպանվելու հարցը։ Միևնույն ժամանակ հաղորդվել է, որ ամերիկյան տիեզերական գործակալությունը նախատեսում է եվրոպական «Ռոզալինդ Ֆրանկլին» ռովերը ուղարկել Մարս 2028 թվականին։