Նվազել է պահանջարկը բիզնես-թրեյներների նկատմամբ

Ռուսաստանում բիզնես-թրեյներների պահանջարկը նվազել է՝ կապված երկրի տնտեսական իրավիճակի և աշխատաշուկայի խնդիրների հետ։ Այս մասին հայտնում է «Գովորիտ Մոսկվա» ռադիոկայանը՝ հղում անելով խորհրդատու և թոփ մենեջերների քոուչ Ալեքսեյ Եժիկովի գնահատականին։

Եժիկովի խոսքով՝ ներկայում ձևավորվել է երկկողմանի ճգնաժամային իրավիճակ, երբ ընկերությունները դժվարությամբ են գտնում համապատասխան ղեկավարների, իսկ աշխատաշուկայում գտնվող մասնագետները չեն կարողանում աշխատանք գտնել։ Նա նշել է, որ առաջիկա մեկ տարվա ընթացքում իրավիճակը չի բարելավվի, և ընկերությունները կշարունակեն կրճատել անձնակազմը և սահմանափակել բյուջեները։

Փորձագետը նաև ընդգծել է, որ իրենց ոլորտը ուղղակիորեն կախված է տնտեսության վիճակից․ տնտեսության անկման պայմաններում նվազում է նաև բիզնես-թրեյներների և հոգեբանների նկատմամբ պահանջարկը։ Ավելի վաղ պաշտոնյաները ևս խոսել էին Ռուսաստանի տնտեսության բարդ իրավիճակի մասին՝ նշելով, որ դանդաղեցումը պայմանավորված է մի շարք գործոններով, այդ թվում՝ հարկային փոփոխություններով և արտաքին պայմաններով։