Ֆելիքսին մի քանի ամսից սպասվում է վիրահատություն. Գոռ Հակոբյանը մանրամասներ է պատմում որդու բուժումից

Դերասան, երգիչ Գոռ Հակոբյանը մանրամասներ է ներկայացրել որդու բուժման ընթացքից։

«Մի օր լավ, մի օր վատ, հասել ենք 3-րդ կուրսին; Ընդհանուր 14 կուրս է, մի քանի օրից 3-ն ենք ստանալու։ Ունենք վիրահատություն, որը սպասվում է օգոստոսի վերջ-սեպտեմբերի սկիզբ։ Այս պահին Ֆելիքսն իրեն լավ է զգում»,-ինսթագրամի իր էջում պատմել է նա։

Դերասանը հայտնում է, որ հիմա տանն են, մեկ ամիս հիվանդանոցում լինելուց հետո բժիշկները մեկ շաբաթով թողել են տանը մնալ։

Հիշեցնենք, որ մարտի 10-ին Գոռ Հակոբյանը հայտարարեց, որ որդու՝ Ֆելիքսի  մոտ ախտորոշվել է  Յուինգի սարկոմա հիվանդություն, բազմաթիվ հետազոտություններ են անցել նաև Մոսկվայում, չարաբաստիկ հիվանդությունը հաստատվել է։

Գերմանիայի Մյունխեն քաղաքում բուժում ստանալու համար նա իր ողջ ունեցվածքը հանել է վաճառքի, սակայն ժամանակը շատ քիչ է, այդ պատճառով նա դրամահավաք էր հայտարարել։ 36 ժամվա ընթացքում հավաքվեց անհրաժեշտ գումարից էլ շատ։ Դերասանը խոստացել է, որ ավել գումարը կփոխանցի մեկ այլ երեխայի բուժման համար։

Յուինգի սարկոման՝ ոսկրային չարորակ ուռուցքի տեսակ է, որի վաղ հայտնաբերումը խիստ կարևոր է։ Յուինգի սարկոման առավել հաճախ հանդիպող սարկոմայի տեսակ է դեռահասների և երիտասարդների շրջանում։ Այն հաճախ ախտահարում է ոսկրերը՝ հատկապես ոտքերի, ձեռքերի և կոնքի շրջանում։ Որոշ դեպքերում ներգրավվում են նաև փափուկ հյուսվածքները։ Հիվանդության վաղ ախտորոշումը չափազանց կարևոր է, քանի որ այն մեծ ազդեցություն ունի բուժման հաջողության վրա։