Սենսացիոն բացահայտում․ հին եգիպտական մումիայի ներսում հայտնաբերվել է «Իլիականի» հատված

Իսպանիայի Բարսելոնայի համալսարանի գիտնականները 1600 տարվա հնություն ունեցող հին եգիպտական մումիայի ներսում հայտնաբերել են Իլիական էպիկական պոեմի հատված։ Այս մասին հայտնում է New York Post-ը։ Գտածոն համարվում է եզակի, քանի որ նմանատիպ հայտնագործություն մինչ այժմ չէր արձանագրվել։

Պապիրուսի կտորը հայտնաբերվել է Օքսիրինխոս քաղաքից հայտնաբերված մումիայի մեջ, որը թվագրվում է մ.թ. IV դարով, երբ Եգիպտոսը հանդիսանում էր Հռոմեական կայսրության նահանգ։ Պապիրուսը, որը բալզամավորողները տեղադրել էին մումիայի որովայնում, պարունակում է «Իլիականի» երկրորդ երգից հատված՝ այսպես կոչված «նավերի ցուցակից», գրված հին հունարենով։

Գիտնականները դեռևս չեն կարող հստակ բացատրել, թե ինչու է այդ գրական հատվածը տեղադրվել մումիայի ներսում, սակայն ենթադրվում է, որ մահացածը կարող էր հատուկ վերաբերմունք ունենալ այդ ստեղծագործության նկատմամբ։ Բացի այդ, դամբարանում հայտնաբերվել են նաև պղնձից և ոսկուց պատրաստված «լեզուներ», որոնք, ըստ հավատալիքների, պետք է օգներ մահացածին շփվել աստվածների հետ հանդերձյալ աշխարհում։