COP17-ի նախաշեմին Երևանում քննարկվել են կենսաբազմազանության պահպանության ֆինանսավորման մեխանիզմները

 

Աշխատաժողովի նպատակն էր COP17-ին ընդառաջ բարձրացնել բանակցողների իրազեկվածությունը և ամրապնդել կարողությունները՝ ներկայացնելով ՏՀԶԿ-ի վերլուծությունների արդյունքները։ Քննարկվեցին կենսաբազմազանության պահպանության տնտեսական գործիքները, ֆինանսական հոսքերի արդյունավետ կառավարման և մասնավոր հատվածի ներգրավման հնարավորությունները։

 

Բացման խոսքով հանդես եկավ նախարարի տեղակալ Արամ Մեյմարյանը՝ ներկայացնելով Հայաստանի առաջնահերթությունները։ Նա ընդգծեց, որ COP17-ի առանցքային նպատակներից է Կունմինգ–Մոնրեալի կենսաբազմազանության գլոբալ շրջանակի իրականացման առաջընթացի առաջին գլոբալ գնահատումը՝ ուղղված բացերի և մարտահրավերների բացահայտմանը։ Կարևորվեց ներառական և թափանցիկ գործընթացի ապահովումը՝ հիմնված ազգային ռազմավարությունների, գիտական տվյալների և տարբեր շահառուների մասնակցության վրա։

 

Նախարարի տեղակալը նաև շեշտեց ռեսուրսների մոբիլիզացիայի և ֆինանսական մեխանիզմների կարևորությունը՝ առանձնացնելով միջազգային և ներքին ֆինանսական հոսքերի ընդլայնման անհրաժեշտությունը։ Նա կարևորեց նաև կենսաբազմազանության, կլիմայի փոփոխության և այլ բնապահպանական ուղղությունների միջև սիներգիաների ամրապնդումը։

 

Ամփոփելով՝ ընդգծվեց, որ աշխատաժողովը նպաստում է տեխնիկական կարողությունների զարգացմանը և գործնական մոտեցումների ձևավորմանը։ Նշվեց նաև, որ կենսաբազմազանության ներառումը մասնավոր հատվածում և ֆինանսական հոսքերի համապատասխանեցումը բնապահպանական նպատակներին առանցքային են՝ բնության ֆինանսավորման բացը լրացնելու համար։

Երևանում կայանալիք COP17-ը պետք է դառնա կարևոր փուլ՝ ապահովելով անցում հանձնառություններից դեպի գործնական և չափելի արդյունքներ։