Հյուսիսային Կորեայում համավարակի ընթացքում կտրուկ աճել են մահապատիժները․ հիմնական պատճառը՝ մշակութային «խախտումները»

Հյուսիսային Կորեայում COVID-19 համավարակի ժամանակ սահմանների փակման ֆոնին զգալիորեն աճել է մահապատիժների թիվը։ Ինչպես հայտնում է Reuters-ը, Սեուլում գործող Transitional Justice Working Group իրավապաշտպան կազմակերպության զեկույցի համաձայն՝ 2020-2024 թվականներին արձանագրվել է առնվազն 60 մահապատժի դեպք, որոնց արդյունքում մահապատժի է ենթարկվել 148 մարդ, մինչդեռ նախորդ հինգ տարում այդ թիվը կազմել էր 41 դեպք։

Զեկույցում նշվում է, որ մահապատիժների ամենամեծ մասը կապված է եղել օտար մշակույթի և կրոնի նկատմամբ սահմանված արգելքների խախտման հետ, այդ թվում՝ հարավկորեական ֆիլմեր կամ սերիալներ դիտելու համար։ Միևնույն ժամանակ աճել են նաև քաղաքական բնույթի մահապատիժները, ինչը, ըստ փորձագետների, կապված է իշխանությունների կողմից վերահսկողության խստացման հետ՝ համավարակի ընթացքում։ Տվյալները հիմնված են Հարավային Կորեայում բնակվող հյուսիսկորեացի փախստականների հարցազրույցների և արբանյակային պատկերների վրա։

Փորձագետների գնահատմամբ՝ այս միտումը կարող է շարունակվել նաև ապագայում՝ կապված իշխանության ներսում հնարավոր փոփոխությունների հետ։ Նշվում է, որ Կիմ Չեն Ըն-ի կողմից ներքին վերահսկողության ուժեղացումը և քաղաքական ճնշումները նպաստել են նման խիստ միջոցների կիրառմանը, իսկ երկրի մասամբ վերաբացումը դեռևս չի հանգեցրել իրավիճակի էական բարելավման։