Էվերեստի ճանապարհը բացվել է․ լեռնագնացները երկու շաբաթ անց կարող են շարունակել բարձրանալ

Նեպալում շերպա լեռնագնացները բացել են դեպի Էվերեստ տանող հիմնական ուղին, որը շուրջ երկու շաբաթ փակ էր սառցե զանգվածների պատճառով։ Ինչպես հայտնում է Reuters-ը, խոշոր սառցե սյունը (սերակ) արգելափակել էր ճանապարհը Խումբու սառցադաշտում՝ թույլ չտալով ալպինիստներին շարունակել բարձրացումը։

Շերպաները, որոնք հայտնի են որպես «սառցադաշտի բժիշկներ», կարողացել են մաքրել հատվածը, տեղադրել պարաններ և սանդուղքներ՝ ապահովելով անվտանգ անցում դեպի առաջին ճամբար՝ մոտ 6060 մետր բարձրության վրա։ Արդյունքում հարյուրավոր լեռնագնացներ, որոնք սպասում էին բազային ճամբարում, այժմ կարող են շարունակել իրենց վերելքը։

Սակայն մասնագետները զգուշացնում են, որ ուշացումը կարող է հանգեցնել լեռնագնացների կուտակումների՝ հատկապես վտանգավոր «մահվան գոտում», որտեղ օդը չափազանց նոսր է։ Ըստ տվյալների՝ այս սեզոնին արդեն տրվել է ավելի քան 400 թույլտվություն, և դա մեծացնում է անվտանգության ռիսկերը, նույնիսկ այն պայմաններում, երբ ուղին արդեն բաց է։