Համբարձում Մաթևոսյանը UNDP ներկայացուցիչի հետ քննարկել է համագործակցության նոր հնարավորությունները

ՀՀ շրջակա միջավայրի նախարար Համբարձում Մաթևոսյանը հանդիպում է ունեցել ՄԱԿ-ի Զարգացման ծրագրի (UNDP) Հայաստանի մշտական ներկայացուցիչ Նաթիա Նացվլիշվիլիի հետ՝ քննարկելու երկկողմ համագործակցության ընթացքն ու առաջիկա ծրագրերը։

Հանդիպման ընթացքում անդրադարձ է կատարվել նաև COP17-ի կազմակերպման նախապատրաստական աշխատանքներին։ Նախարարը կարևորել է համաժողովի ներառական և բարձր ազդեցություն ունեցող անցկացումը Երևանում՝ «Leaders for Nature» գաղափարի շուրջ միավորելով պետությունների ղեկավարներին, միջազգային կազմակերպություններին, գիտական հանրույթին և այլ շահագրգիռ կողմերին։

Կողմերը քննարկել են կենսաբազմազանության գլոբալ շրջանակի՝ Կունմին-Մոնրեալի նպատակների իրականացման ընթացքը, ֆինանսական ռեսուրսների հասանելիության ընդլայնման և ոլորտային համագործակցության խորացման հնարավորությունները։

Առանձին ուշադրություն է դարձվել UNDP-ի հետ համատեղ իրականացվող և նախատեսվող ծրագրերին։ Նախարարը նշել է, որ երկարամյա համագործակցությունն արդեն իսկ տվել է զգալի արդյունքներ՝ նպաստելով միջազգային պարտավորությունների կատարմանը, ինչպես նաև ոլորտային օրենսդրության և կառավարման համակարգերի զարգացմանը։

Քննարկվել են նաև նոր նախաձեռնություններ՝ ներառյալ Կենսաբազմազանության գլոբալ հիմնադրամի (GEF-9) շրջանակում տարածաշրջանային ծրագրերը և Կլիմայի հարմարվողականության հիմնադրամի հետ համագործակցության հնարավորությունները՝ ուղղված անտառային հրդեհների ռիսկերի նվազեցմանը և ջրային ռեսուրսների կառավարման արդյունավետության բարձրացմանը։

Համբարձում Մաթևոսյանը վերահաստատել է Հայաստանի պատրաստակամությունը՝ շարունակելու և խորացնելու համագործակցությունը ՄԱԿ-ի Զարգացման ծրագրի հետ՝ շրջակա միջավայրի պահպանության, կենսաբազմազանության պահպանման և «կանաչ» զարգացման օրակարգի առաջմղման ուղղությամբ։