Գրադարանները պետք է լինեն հանրային ակտիվ միջավայրեր, իսկ դպրոց–գրադարան համագործակցությունը՝ առաջնահերթ․ Ժաննա Անդրեասյան

 

Նախարարն ընդգծել է, որ գրադարանները պետք է լինեն հանրային ակտիվ միջավայրեր, իսկ դպրոց–գրադարան համագործակցությունը՝ առաջնահերթ: Անդրադառնալով գրադարանների զարգացմանը՝ Ժաննա Անդրեասյանը տեղեկացրել է, որ նախատեսվում է դպրոցական բյուջեներում առանձնացնել առանձին տող գրքերի ձեռքբերման համար. «Փաթեթային տրամաբանությամբ նախատեսում ենք նորակառույց դպրոցների համար ձեռք բերել և տրամադրել նոր գրքերի հավաքածուներ։ Դրանք կլինեն դպրոցական ծրագրին և տարիքային առանձնահատկություններին համապատասխան գրքեր։ Միևնույն ժամանակ, նախատեսվում է գրադարանային ֆոնդերի շարունակական թարմացում, ինչը հնարավորություն կտա դպրոցներին ամեն տարի համալրել իրենց գրական պաշարները»:

 

Տնօրենների հետ հանդիպմանը հարցուպատասխանի ձևաչափով քննարկվել են մի շարք խնդիրներ, որոնք, մասնավորապես, վերաբերել են վարչատնտեսական համակարգողների գործառույթներին, դպրոցներում անվտանգության խնդիրներին, լաբորատոր հագեցվածությանը, Երևանի դպրոցներում «Դպրոցական սնունդ» ծրագրի ներդրմանը, ուսուցիչների անվտանգությանը, ծնողների հետ աշխատանքի նոր մոտեցումներին, պարտադիր կրթությունից դուրս մնացած երեխաների հայտնաբերմանը, աշակերտների բացակայությունների հաշվառմանը և այլ հարցերի։