Մադուրոյի մասին տեղեկատվության շնորհիվ 400 000 դոլար շահած ամերիկացի զինվորը ցուցմունք է տվել դատարանում

Վենեսուելայի նախկին առաջնորդ Նիկոլաս Մադուրոյի ձերբակալման պլանավորմանը մասնակցած ԱՄՆ հատուկ նշանակության ուժերի զինծառայողը չի ընդունել իր մեղքը Polymarket հարթակում խաղադրույքներ կատարելու համար գաղտնի տեղեկատվություն օգտագործելու մեջ, հաղորդում է Politico-ն՝ հղում անելով Մանհեթենի դաշնային դատարանին։

Լսումներից հետո դատավորը 38-ամյա Գենոն Քեն Վան Դայքին ազատ է արձակել 250 000 դոլար գրավի դիմաց մինչև նրա հաջորդ լսումը, որը նշանակված է հունիսի 8-ին։ Վան Դայքի փաստաբան Զաք Ինտրեյթերը հայտարարել է, որ իր պաշտպանյալը մինչև լսումների ավարտը զինվորական ծառայությունից արձակուրդում է, բայց թե արդյոք նա դրանից հետո կմնա ԱՄՆ բանակում, դեռևս պարզ չէ։

Վան Դայքը մեղադրվում է Մադուրոյին ձերբակալելու գործողության վերաբերյալ գաղտնի կառավարական տեղեկատվությունն անձնական շահի համար անօրինական կերպով օգտագործելու, ոչ հրապարակային տեղեկատվություն յուրացնելու և ապրանքային խարդախություն կատարելու մեջ։ Մեղադրողների խոսքով՝ նա  33 000 դոլար խաղադրույք է կատարել և շահել ավելի քան 400 000 դոլար։