ԵՄ ընդդիմությունը կոչ է անում ռուսական վառելիք գնել

Գերմանիայի և Հունաստանի խորհրդարանների ընդդիմադիր կուսակցությունները պահանջել են, որ կառավարությունը թույլատրի ավիացիոն վառելիքի ներմուծումը Ռուսաստանից՝ դրա պակասի պատճառով, հաղորդում է «Իզվեստիա» թերթը։

Ընդդիմադիր «Հունական լուծում» կուսակցության առաջնորդ և խորհրդարանի անդամ Կիրիակոս Վելոպուլոսը հայտարարել է, որ անհրաժեշտ է երաշխավորել ավիացիոն վառելիքի մատչելիությունը և գների կայունությունը զբոսաշրջային սեզոնից առաջ։ Նա ընդգծել է, որ ավիացիոն վառելիքի մատակարարման խափանումները անմիջական սպառնալիք են Հունաստանի տնտեսության և զբոսաշրջության, հյուրընկալության և տրանսպորտի ոլորտում աշխատող հարյուր հազարավոր քաղաքացիների կենսապահովման համար։ Այդ նպատակով՝ Հունաստանի կառավարությունը պետք է հետևի պրագմատիկ էներգետիկ քաղաքականությանը, որը կպաշտպանի ազգային շահերը և չի բացառի Ռուսաստանին՝ որպես մատակարար։

Նմանատիպ դիրքորոշում է որդեգրել նաև ընդդիմադիր «Գերմանիայի համար այլընտրանք» կուսակցությունը։ Գերմանիայի Բունդեսթագի անդամ և կուսակցության էներգետիկ քաղաքականության խոսնակ Շտեֆեն Կոտրեն հայտարարել է, որ Բեռլինը պետք է մեղմացնի հակառուսական պատժամիջոցները՝ վառելիքի մատակարարումն ապահովելու և չվերթների լայնածավալ չեղարկումները կանխելու համար։ Սակայն քաղաքական գործիչը նշել է, որ կառավարությանն իր բազմիցս ուղղված խնդրանքները՝ պատժամիջոցները մեղմելու վերաբերյալ, միայն բացասական արձագանքներ են ստացել։ Պատգամավորի խոսքով՝ երկրի կառավարությունը պատրաստ է թուլացնել սեփական տնտեսությունը պարզապես Ռուսաստանի դեմ պատժամիջոցները պահպանելու համար։