Քննարկվել է «Բարձրագույն կրթության և գիտության մասին» օրենքի փոփոխության նախագիծը (տեսանյութ)

ԱԺ ԳԿՄՍԵՍ հարցերի մշտական հանձնաժողովի հերթական նիստում երկրորդ ընթերցմամբ քննարկվել է «Բարձրագույն կրթության և գիտության մասին» օրենքում փոփոխություններ կատարելու մասին նախագիծը:

ԿԳՄՍ նախարար Ժաննա Անդրեասյանի խոսքով՝ այս փոփոխությունները միտված են անցումային շրջանում կարգավորումներն առավել հստակեցնելուն և համակարգի անխափան գործառնությունն ապահովելուն՝ մինչև նոր ենթաօրենսդրական կարգավորումների ամբողջական ուժի մեջ մտնելը և նախատեսված բարեփոխումների լիարժեք իրականացումը։

Նախարարի խոսքով՝ առաջինից երկրորդ ընթերցման ընթացքում հանձնաժողովի ներկայացրած առաջարկների վերաբերյալ Կառավարության դիրքորոշումը դրական է. դրանք վերաբերում են Գիտությունների ազգային ակադեմիայի գործունեության համար առավել բարենպաստ պայմանների ձևավորմանը՝ մասնավորապես հաշվի առնելով ակադեմիկոսների անդամության և նախագահության ձևավորման առանձնահատկությունները։

Հստակեցումներ են առաջարկվում նաև բուհական ընդունելության նոր համակարգին անցում կատարելու ժամկետների առումով․ նոր կարգով ընդունելությունը նախատեսվում է իրականացնել 2030 թվականին, իսկ մինչ այդ՝ մինչև 2029-30 ուսումնական տարին ներառյալ, բուհերի ընդունելությունը կկազմակերպվի գործող կարգի համաձայն։

Ժաննա Անդրեասյանի խոսքով՝ բուհերի հետ քննարկումները ցույց են տվել, որ որոշ դրույթներ խմբագրման կարիք ունեն՝ հատկապես ներհամակարգային գործառնական հարցերի առավել հստակ կարգավորման նպատակով։ Այս փոփոխությունները ևս քննարկվել են աշխատանքային կարգով։

Միաժամանակ, ԿԳՄՍ նախարարը պատրաստակամություն է հայտնել շարունակելու աշխատանքը գործընկերների հետ՝ դիտարկելու բոլոր առաջարկներն ու լրացուցիչ հստակեցումների անհրաժեշտությունը։