Մերցը կոչ է արել Իրանին բանակցություններ սկսել Թրամփի քննադատությունից հետո

Գերմանիայի կանցլեր Ֆրիդրիխ Մերցը կոչ է արել Իրանի իշխանություններին բանակցություններ սկսել ԱՄՆ-ի հետ՝ հակամարտությունը լուծելու և «ժամանակ չվատնելու» համար։ Նա այս հայտարարությունն արել է ԱՄՆ նախագահ Դոնալդ Թրամփի քննադատությունից և Գերմանիայից ամերիկյան որոշ զորքերի դուրսբերման սպառնալիքից հետո։

Կանցլերը հիշեցրել է, որ անցյալ շաբաթ ԵՄ գագաթնաժողովի ժամանակ կոչ է արել «մեծացնել պատժամիջոցների ճնշումը Իրանի վրա, քանի որ եթե Հորմուզի նեղուցը մնա փակ, դա կարող է լուրջ տնտեսական հետևանքներ ունենալ բոլորի համար»։

«Հետևաբար, մեր ուղերձն այն է, որ Իրանը պետք է նստի բանակցությունների սեղանի շուրջ, դադարի ժամանակ վատնել և չի կարելի թույլ տալ, որ շարունակի պատանդ պահել ամբողջ տարածաշրջանը և, վերջին հաշվով, ամբողջ աշխարհը։ Իրանի ռազմական միջուկային ծրագիրը պետք է դադարեցվի։ Իսրայելի և նրա գործընկերների դեմ այլևս հարձակումներ չպետք է լինեն տարածաշրջանում», - ասել է Մերցը Ստորին Սաքսոնիայի Մյունստեր քաղաքում գտնվող ցամաքային զորքերի վարժարան այցելության ժամանակ։

Գերմանիայի կառավարության ղեկավարը հավելել է, որ «երբ ստեղծվեն անհրաժեշտ պայմանները, Գերմանիան պատրաստ կլինի օգտագործել ռազմական միջոցներ՝ Հորմուզի նեղուցում նավարկության ազատությունն ապահովելու համար»։