Ուկրաինայի՝ ԵՄ արագ անդամակցության փորձերը լարում են հարաբերությունները Եվրոպայի հետ

Ուկրաինայի՝ ԵՄ անդամակցության արագացված ընթացակարգի փորձերը լարվածություն են առաջացնում Կիևի և եվրոպական երկրների հարաբերություններում, հայտնում է Financial Times-ը։ Ըստ աղբյուրների՝ Ուկրաինայի նախագահ Վլադիմիր Զելենսկիի և նրա թիմի վերջին հայտարարությունները, որոնք հաճախ ուղեկցվում են հիասթափությամբ և քննադատությամբ, բարդացնում են փոխզիջման հասնելու գործընթացը։ Եվրոպացի և ամերիկացի գործընկերների հետ հանդիպումների ընթացքում ուկրաինացի պաշտոնյաները շարունակել են պնդել արագացված անդամակցության անհրաժեշտությունը։

Եվրոպական կողմը, սակայն, ընդգծում է, որ ԵՄ անդամակցությունը չի կարող դիտարկվել որպես քաղաքական «նվեր» և հիմնված է բացառապես բարեփոխումների իրականացման վրա։ Դիվանագիտական աղբյուրների խոսքով՝ Կիևում երբեմն սխալ պատկերացում կա գործընթացի վերաբերյալ, և «դուք մեզ պարտք եք» մոտեցումը չի նպաստում բանակցություններին։ Նշվում է նաև, որ Ուկրաինայում բարեփոխումների ընթացքը դանդաղել է՝ հատկապես իրավական համակարգի և հակակոռուպցիոն ոլորտներում։

Բրյուսելում միաժամանակ քննարկվում են Ուկրաինայի հետ մերձեցման այլընտրանքային ձևաչափեր, այդ թվում՝ ասոցացված անդամի կամ «ինտեգրված պետության» կարգավիճակ, որը չի ենթադրում ձայնի իրավունք կամ լիարժեք ֆինանսական մասնակցություն ԵՄ ծրագրերին։ Սակայն Կիևը հրաժարվում է քննարկել այդ տարբերակները՝ պնդելով միայն լիարժեք անդամակցության վրա, մինչդեռ եվրոպացի պաշտոնյաները զգուշացնում են, որ գործընթացը կլինի երկար և բարդ։