Թրամփը բարձրացնում է ԵՄ-ից ներմուծվող ավտոմեքենաների մաքսատուրքերը՝ սրելով առևտրային լարվածությունը

ԱՄՆ նախագահ Դոնալդ Թրամփը հայտարարեց, որ հաջորդ շաբաթ կբարձրացնի Եվրոպական միությունից ներմուծվող ավտոմեքենաների և բեռնատարների մաքսատուրքերը՝ 15%-ից հասցնելով 25%-ի՝ պատճառաբանելով, որ ԵՄ-ը չի պահպանում Վաշինգտոնի հետ կնքված առևտրային համաձայնագիրը, հայտնում է REUTERS-ը։ Այս քայլը կտրուկ քննադատության արժանացավ եվրոպացի քաղաքական գործիչների և տնտեսագետների կողմից, որոնցից մեկը կոչ արեց Բրյուսելին և Գերմանիային սահմանել պատասխան մաքսատուրքեր։ Թրամփը նաև նշել է, որ եթե եվրոպական արտադրողները արտադրություն կազմակերպեն ԱՄՆ-ում, մաքսատուրքեր չեն կիրառվի։

Նրա խոսքով՝ բարձրացված մաքսատուրքերը միլիարդավոր դոլարներ կբերեն ԱՄՆ-ին և կստիպեն եվրոպական ավտոարտադրողներին արագ տեղափոխել արտադրությունը Միացյալ Նահանգներ։ Սակայն Եվրոպական հանձնաժողովը մերժել է այդ պնդումները՝ հայտարարելով, որ ԵՄ-ը պահպանում է համաձայնագրի պայմանները և պատրաստ է պաշտպանել իր շահերը, եթե Վաշինգտոնը խախտի պայմանավորվածությունները։

Միևնույն ժամանակ, ԱՄՆ-ի և ԵՄ-ի միջև լարվածությունը աճում է նաև Իրանի պատերազմի և Հորմուզի նեղուցի շուրջ տարաձայնությունների պատճառով։ Թրամփը սպառնացել է կրճատել ամերիկյան զորքերը Գերմանիայում, Իտալիայում և Իսպանիայում, այն բանից հետո, երբ Գերմանիայի կանցլեր Ֆրիդրիխ Մերցը քննադատել է ԱՄՆ-ի դիրքորոշումը։ Լուրը տարածվել է մայիսի 1-ի տոնի օրը և համընկել ԵՄ–Մերկոսուր նոր առևտրային համաձայնագրի մեկնարկի հետ։