ԱՄՆ-ն Գերմանիայից զորքերի դուրսբերումը կապում է Իրանի հարցում Բեռլինի դիրքորոշման հետ

ԱՄՆ ռազմական պաշտոնյաները մասնավոր զրույցներում հասկացրել են, որ Գերմանիայից ամերիկյան զորքերի մի մասի դուրսբերման որոշումը պատժիչ քայլ է Բեռլինի՝ Իրանի հարցում ունեցած դիրքորոշման համար, հայտնում է The New York Times-ը՝ հղում անելով աղբյուրներին։

Նրանց խոսքով՝ Գերմանիայի՝ ԱՄՆ-ին Իրանի դեմ ռազմական գործողությանը աջակցելուց հրաժարվելը դժգոհություն է առաջացրել Վաշինգտոնում։ Թեև Պենտագոնը նախկինում ևս դիտարկել էր Գերմանիայում ռազմական ներկայության կրճատման տարբերակը, ամերիկացի ռազմական պաշտոնյաները խոստովանել են, որ այս քայլը նաև պայմանավորված է եղել ԱՄՆ-ին քննադատելու համար Գերմանիային «պատժելու» ցանկությամբ։

Ավելի վաղ Պենտագոնը հայտարարել էր, որ առաջիկա 6-12 ամիսների ընթացքում Գերմանիայից դուրս կբերի 5,000 զինծառայող։

ԱՄՆ նախագահ Դոնալդ Թրամփը ևս հայտարարել էր, որ Վաշինգտոնը քննարկում է Գերմանիայում, Իտալիայում և Իսպանիայում տեղակայված ամերիկյան զորախմբի կրճատումը։ Թեև նա չի մանրամասնել Գերմանիայի հետ կապված որոշման պատճառները, հայտարարությունը հնչել է այն բանից հետո, երբ Գերմանիայի կանցլեր Ֆրիդրիխ Մերցը քննադատել էր ԱՄՆ-ի ռազմական գործողությունները Իրանի դեմ՝ նշելով հստակ ռազմավարության բացակայությունը։ Երեքշաբթի օրը Թրամփը նաև մեղադրել էր Մերցին՝ պնդելով, թե նա «ընդունելի է համարում Իրանի կողմից միջուկային զենքի ձեռքբերումը»։