Axios․ Իրանն ԱՄՆ-ի հետ համաձայնագրի շուրջ բանակցությունների համար մեկամսյա ժամկետ է սահմանել

Իրանը հինգշաբթի ԱՄՆ-ին է փոխանցել 14 կետից բաղկացած թարմացված առաջարկ՝ շրջանակային համաձայնագրի վերաբերյալ։

Ինչպես հաղորդում էAxios-ը՝ հղում անելով առաջարկին ծանոթ աղբյուրներին, Թեհրանը մեկամսյա ժամկետ է սահմանել համաձայնագրի շուրջ բանակցությունների համար, որը նախատեսում է Հորմուզի նեղուցի բացում, ԱՄՆ-ի կողմից ծովային շրջափակման դադարեցում և պատերազմի վերջնական ավարտ՝ ինչպես Իրանում, այնպես էլ Լիբանանում։

Իրանական առաջարկի համաձայն, միայն նման համաձայնության հասնելուց հետո պետք է սկսվի բանակցությունների ևս մեկ ամիս՝ արդեն միջուկային ծրագրի շուրջ, հայտնել են աղբյուրները։

Այս ֆոնին ԱՄՆ նախագահ Դոնալդ Թրամփը շաբաթ օրը լրագրողներին ասել է, որ կարող է կրկին ռազմական հարվածներ հասցնելու հրաման տալ, եթե Իրանն «իրեն վատ պահի»։

«Եթե նրանք վատ պահեն իրենց, եթե ինչ-որ վատ բան անեն՝ կտեսնենք։ Այդպիսի հնարավորություն, անկասկած, կա», — ասել է Թրամփը՝ պատասխանելով նոր հարվածների հնարավորության մասին հարցին։

Axios-ը նշում է, որ, չնայած ԱՄՆ-ի և Իրանի միջև շրջանակային համաձայնագրի նախագծերի շարունակվող փոխանակմանը, Թրամփը նաև լրջորեն դիտարկում է Թեհրանի դեմ նոր ռազմական գործողության հնարավորությունը՝ փորձելով հաղթահարել ներկայիս փակուղին։

Axios-ի տվյալներով, հինգշաբթի Թրամփը նաև զեկույց է ստացել ԱՄՆ Կենտրոնական հրամանատարության ղեկավար, ծովակալ Բրեդ Կուպերից՝ Իրանի դեմ հնարավոր նոր հարվածների ծրագրերի վերաբերյալ։ Դրանից հետո Կուպերը մեկնել է տարածաշրջան և շաբաթ օրը հանդիպել զինծառայողների հետ Արաբական ծովում գտնվող USS Tripoli նավի վրա։

Ուրբաթ օրը Թրամփը հայտարարել է, որ իրեն չի բավարարում իրանական առաջարկը, սակայն շաբաթ օրը Փալմ Բիչից Մայամի մեկնելուց առաջ լրագրողներին հայտնել է, որ մտադիր է ուսումնասիրել փաստաթուղթը թռիչքի ընթացքում։

«Ես ուսումնասիրում եմ դա։ Ավելի ուշ ձեզ կհայտնեմ իմ կարծիքը… Ինձ ներկայացրել են գործարքի հայեցակարգը։ Հիմա նրանք պատրաստվում են ինձ տրամադրել ճշգրիտ ձևակերպումները», — ասել է նա։

Դրանից կարճ ժամանակ անց Թրամփը Truth Social սոցիալական ցանցում գրել է, որ «չի կարող պատկերացնել, թե այս առաջարկը կարող է ընդունելի լինել», և ընդգծել է, որ Իրանը «վերջին 47 տարիների ընթացքում մարդկության և աշխարհի դեմ կատարածի համար դեռևս բավական բարձր գին չի վճարել»։