Վուչիչ. Գերմանիայից զորքերի դուրսբերման հայտարարությունից հետո ԵՄ-ԱՄՆ հարաբերությունները հասել են անդարձելի կետի

Սերբիայի նախագահ Ալեքսանդր Վուչիչը հայտարարել է, որ Գերմանիայից ամերիկյան զորքերի դուրսբերումը վկայում է ԱՄՆ-ի և Եվրամիության միջև հարաբերություններում անդարձելիության կետի մասին, հաղորդում է «Večernje novosti» թերթը։

«Վաշինգտոնի որոշումը Գերմանիայից զորքերի մասնակի դուրսբերման մասին կարևոր քաղաքական հայտարարություն է, որը շատ բան է ասում երկու խոշորագույն արևմտյան տերությունների միջև հարաբերությունների մասին։ … Ակնհայտ է, որ շահերն այլևս չեն համընկնում, և որ մենք հասել ենք անդարձելիության կետի», – ասել է սերբ առաջնորդը։

Նա հավելել է, որ ԱՄՆ նախագահ Դոնալդ Թրամփի որոշումը Գերմանիայից զորքերը դուրս բերելու մասին նշանավորում է գերմանացիների և ամերիկացիների միջև առճակատման սկիզբ, որը արագորեն կսրվի։ Վուչիչը նշել է, որ Վաշինգտոնի հետ տարաձայնությունները կարող են նաև բացասաբար անդրադառնալ սերբական տնտեսության, քաղաքականության և բիզնեսի վրա։

Ապրիլի 29-ին Թրամփը հայտարարել է, որ ԱՄՆ-ն քննարկում է Գերմանիայում տեղակայված իր ռազմական զորակազմի կրճատման հարցը և շուտով որոշում կկայացնի այս հարցի վերաբերյալ։ Ապրիլի 30-ին լրագրողների հարցերին պատասխանելով՝ Սպիտակ տան բնակիչը խոստովանել է, որ ԱՄՆ-ն կարող է կրճատել իր զորքերի թիվը ոչ միայն Գերմանիայում, այլև Իտալիայում և Իսպանիայում։