Շվեդիան հայտարարել է ռուսական նավի կալանման մասին

Շվեդիան իր ջրերում կալանել է նավ, որը, ենթադրաբար, պատկանում է, այսպես կոչված, «ռուսական ստվերային նավատորմին»։ Այս մասին հայտարարել է Շվեդիայի պաշտպանության նախարար Կարլ-Օսկար Բոհլինը X սոցիալական ցանցում։

Նրա խոսքով՝ «Ջին Հույ» անունով նավը կասկածվում է կեղծ դրոշի ներքո նավարկելու մեջ։ Այն գտնվում է Եվրամիության, Մեծ Բրիտանիայի և Ուկրաինայի պատժամիջոցների ցանկում։

BILD-ը հաղորդում է, որ 182 մետր երկարությամբ նավը կանգնեցվել է ապրիլի 3-ի կեսօրին՝ Տրելեբորգ նավահանգստային քաղաքի մոտ, Շվեդիայի ջրերում։ Ափային պահպանությունը հայտարարել է, որ այն նավարկում էր Սիրիայի դրոշի ներքո և «հավանաբար» բեռ չի ունեցել, իսկ նպատակը անհայտ է։

Նավի ծովային պիտանիության վերաբերյալ հետաքննություն է ընթանում։ Բոհլինը, որպես լրացուցիչ բողոք, նշել է ապահովագրության անբավարար ծածկույթը։