Ուկրաինացի քաղաքագետը կոշտ արձագանքել է Փաշինյան-Զելենսկի հանդիպմանը

Ուկրաինացի քաղաքագետ Կոնստանտին Բոնդարենկոն քննադատել է Հայաստանի վարչապետ Նիկոլ Փաշինյանի հանդիպումը Ուկրաինայի նախագահ Վլադիմիր Զելենսկու  հետ՝ այն անվանելով քաղաքականապես ռիսկային քայլ։ Նա սոցիալական ցանցերում հեգնական գրառում է արել՝ ակնարկելով, թե նման շփումները կարող են բացասական հետևանքներ ունենալ Փաշինյանի համար։

Բոնդարենկոյի խոսքով՝ նման հանդիպումը տեղի է ունենում Հայաստանի ներքաղաքական կարևոր ժամանակահատվածում, երբ երկրում սպասվում են ընտրություններ, և այն կարող է անդրադառնալ վարչապետի դիրքերի վրա։ Քաղաքագետը նաև սարկաստիկ կերպով նշել է, թե Զելենսկին կարող է «մեկ այլ հաղթանակ գրանցել իր հաշվին»։

Ավելի վաղ նույն վերլուծաբանը անդրադարձել էր նաև միջազգային խաղաղ բանակցությունների անարդյունավետությանը՝ նշելով, որ դրա պատճառներից մեկն Ուկրաինայի ղեկավարության ներսում առկա լարված հարաբերություններն են, մասնավորապես Զելենսկու և նրա շրջապատի որոշ առանցքային դեմքերի միջև։