ԵՄ-ը պահանջում է Մեծ Բրիտանիայից տարեկան միլիարդավոր վճարներ՝ շուկա հասանելիության դիմաց

Եվրոպական միությունը պահանջել է, որ Մեծ Բրիտանիան տարեկան շուրջ 1,15 միլիարդ եվրո վճարի՝ եվրոպական շուկա հասանելիությունը պահպանելու համար։ Այս մասին գրում է «The Times»-ը՝ նշելով, որ նման պահանջ առաջին անգամ է ներկայացվում Brexit-ից հետո։

Ըստ աղբյուրների՝ Բրյուսելը այս պայմանը դիտարկում է որպես հետագա ինտեգրման նախապայման և ակնկալում է, որ վարչապետ Կիր Սթարմերը որոշում կընդունի մինչև մայիսի 4-ին Երևանում նախատեսված ԵՄ գագաթնաժողովը։ Աղբյուրները նշում են, որ եթե Լոնդոնը ցանկանում է պահպանել սերտ տնտեսական կապերը, պետք է «վճարի մասնակցության համար»։

Քննարկվում է նաև շվեյցարական մոդելի կիրառումը, որի համաձայն՝ ԵՄ անդամ չհանդիսացող երկրները կատարում են տարեկան վճարումներ՝ ընդհանուր շուկա մուտքի դիմաց։ Նշվում է, որ նման մեխանիզմը կարող է նպաստել ԵՄ ներսում տնտեսական և սոցիալական անհավասարությունների նվազեցմանը։