Եվրահանձնաժողովը Սերբիայի ֆինանսավորումը սառեցնելու որոշում չի կայացրել

Եվրոպական հանձնաժողովը (ԵՀ) որոշում չի կայացրել Սերբիայի ֆինանսավորումը սառեցնելու վերաբերյալ. այն պարզապես գնահատում է, թե արդյոք Սերբիան կատարել է նոր վճարումների պայմանները: Այս մասին Բրյուսելում կայացած ճեպազրույցի ժամանակ հայտարարել է ԵՄ խոսնակ Մարկուս Լամերտը։

«Եվրոպական հանձնաժողովը որևէ պաշտոնական որոշում չի կայացրել Սերբիայի համար եվրոպական ֆինանսավորումը սառեցնելու վերաբերյալ», - ասել է նա: «Ոչինչ չի փոխվել: Մենք գնահատում ենք Սերբիայի կողմից բոլոր պայմանների կատարումը. սա շարունակական գործընթացի մի մասն է»։

Նա, մասնավորապես, ընդգծել է, որ Եվրոպական հանձնաժողովը սպասում է Բելգրադի կողմից դատական ​​անկախության վերաբերյալ Եվրոպայի խորհրդի Վենետիկի հանձնաժողովի առաջարկությունների կատարմանը։

Ավելի վաղ ընդլայնման հարցերով եվրահանձնակատար Մարթա Կոսը Շվեյցարիայում կայացած համաժողովում հայտարարել է, որ ԵՀ-ն «սառեցրել է Սերբիայի համար եվրոպական ֆինանսավորումը», առանց նշելու ժամկետները կամ գումարը։