Ժնևում քննարկվել են շրջակա միջավայրի մոնիթորինգի և տվյալների կառավարման հարցերը

Ապրիլի 22–24-ը Ժնևում կայացավ ՄԱԿ-ի Եվրոպական տնտեսական հանձնաժողով «Շրջակա միջավայրի մոնիթորինգ և գնահատում» աշխատանքային խմբի 28-րդ նստաշրջանը և դրան նախորդող թեմատիկ աշխատաժողովը՝ նվիրված Շրջակա միջավայրի վիճակի և հեռանկարի վերաբերյալ հաշվետվությունների պատրաստմանը և կանխատեսման գործիքների կիրառմանը։ Նստաշրջանի բացումը հայտարարեց ՄԱԿ ԵՏՀ շրջակա միջավայրի և անտառների բաժնի տնօրեն Պաոլա Դեդան, իսկ աշխատանքային խմբի 28-րդ նստաշրջանի նախագահությունն իրականացրեց ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի տեղակալ Գայանե Շահնազարյանը։ 

Ներկայացվեց աշխատանքային խմբի 2027 թվականի գործունեության նախնական ժամանակացույցը, որը միտված է՝

• շրջակա միջավայրի մոնիթորինգի համակարգերի արդիականացմանը,

• բաց տվյալների և SEIS սկզբունքների ներդրմանը,

• բնապահպանական գնահատումների և հաշվետվությունների զարգացմանը՝ ի նպաստ կանաչ և շրջանաձև տնտեսության,

• տվյալների ինտեգրմանը՝ Կայուն զարգացման նպատակների (SDG) իրականացման և մոնիթորինգի համար,

• ազգային մակարդակում ինստիտուցիոնալ և կարգավորող մեխանիզմների կատարելագործմանը։ 

Քննարկվեցին նաև՝

• տվյալների կառավարման, որակի ապահովման և փոխանակման մեխանիզմների բարելավման հարցերը,

• թվայնացման, մեծածավալ տվյալների վերլուծության և արհեստական բանականության կիրառման հնարավորությունները,

• տարբեր ոլորտների մոնիթորինգի արդիական մոտեցումները (ջուր, հող, կենսաբազմազանություն, աղտոտվածություն, աղմուկ և այլ)։ 

Միջազգային կազմակերպությունների կողմից ներկայացվեցին ընթացիկ նախաձեռնությունները և ծրագրերը, այդ թվում՝

• ԵՄ-ն հանուն կանաչ վերականգնման ծրագրի (#EU4GreenRecoveryEast)՝ հիմնական միջոցառումների վերաբերյալ,

• ՄԱԿ-ի շրջակա միջավայրի ծրագիր (#UNEP)՝ հողի աղտոտման մոնիթորինգի վերաբերյալ,

• Շրջակա միջավայրի եվրոպական գրասենյակի (#EEA)՝ ԵՄ քաղաքականություններին համահունչ զարգացումների և «Եվրոպայի շրջակա միջավայրը 2025» զեկույցի վերաբերյալ,

• Եվրոպական հանձնաժողովի համատեղ հետազոտական կենտրոն (#JRC)՝ Երկրի դիտարկման և երկրատարածական տվյալների կիրառման վերաբերյալ։

Աշխատաժողովի նպատակն էր ներկայացնել և քննարկել շրջակա միջավայրի վիճակի և զարգացման հեռանկարների վերաբերյալ հաշվետվությունների պատրաստման ժամանակակից մոտեցումները․  ցուցանիշների ընտրություն և կիրառություն, սոցիալ-տնտեսական և բնապահպանական տվյալների կապերի վերլուծություն, տվյալների վերածում քաղաքականության համար կիրառելի վերլուծությունների,  արդյունքների մատչելի ներկայացում՝ վիզուալիզացիայի միջոցով, կանխատեսման և հեռանկարային գործիքների կիրառում։ 

Աշխատաժողովն ընդգծեց տվյալահեն որոշումների կարևորությունը և միջազգային համագործակցության դերը՝ շրջակա միջավայրի մոնիթորինգի և գնահատման համակարգերի զարգացման գործում։ 

«Հիդրոօդերևութաբանության և մոնիթորինգի կենտրոն» ՊՈԱԿ-ը շարունակում է ակտիվ ներգրավվածությունը այս գործընթացներում՝ նպաստելով ազգային մոնիթորինգի համակարգերի զարգացմանը: