Ռուսաստանում կոչ են անում հրաժարվել GPS-ից․ մարտական դրոնները անցնում են «տեսնող» տեխնոլոգիաների

Ռուսաստանում քննարկվում է մարտական դրոնների աշխատանքի նոր մոտեցում, որը ենթադրում է հրաժարում արբանյակային նավիգացիայից։ «Իզվեստիա»-ում հրապարակված հոդվածում ԿԲԱԼ-ի գլխավոր կոնստրուկտոր Դմիտրի Կուզյակինը նշում է, որ ժամանակակից անօդաչու սարքերը աստիճանաբար անցնում են մեքենայական տեսողության՝ նվազեցնելով կախվածությունը Global Positioning System-ից, որի ազդանշանը կարող է կեղծվել։

Կուզյակինի խոսքով՝ այս տեխնոլոգիական շրջադարձը ոգեշնչված է Ingenuity մարսյան ուղղաթիռի փորձից, որը գործել է առանց GPS-ի՝ հիմնվելով տեսողական նավիգացիայի վրա։ Նրա գնահատմամբ՝ եթե նախկինում GPS-ի խափանումը կարող էր լիովին շարքից հանել սարքը, ապա այսօր նման միջամտությունները դիտվում են որպես աննշան խոչընդոտ, որը համակարգիչը կարող է անտեսել։

Հիշեցնենք, որ NASA-ի տվյալներով՝ Ingenuity-ը Մարսում իրականացրել է 72 թռիչք՝ անցնելով շուրջ 17 կմ։ Թեև սարքը հետագայում կորցվել է մոլորակի ռելիեֆի առանձնահատկությունների պատճառով, նրա տեխնոլոգիաները դիտարկվում են ապագա առաքելությունների համար, այդ թվում՝ Մարսից հողի առաջին վերադարձի ծրագրերում։