ՆԱՏՕ-ն խոստովանում է հետընթաց․ դաշինքը զիջում է նավատորմի թվով

ՆԱՏՕ-ի երկրները բախվել են ռազմածովային ուժերի կրճատման խնդրի և ներկայումս զիջում են իրենց մրցակիցներին նավերի քանակով։ Այս մասին հայտարարել է դաշինքի փոխակերպման հարցերով միացյալ ուժերի գերագույն հրամանատար, ֆրանսիացի ադմիրալ Պիեռ Վանդիեն՝ հարցազրույցում Kathimerini-ին։

Նրա խոսքով՝ ՆԱՏՕ-ի ռազմածովային կարողությունները զգալիորեն նվազել են, ինչը հանգեցրել է դիրքային հետընթացի։ Ադմիրալը չի հստակեցրել, թե որ երկրների հետ համեմատության մասին է խոսքը, սակայն ընդգծել է, որ խնդիրն ակնհայտ է և պահանջում է արագ լուծումներ։

Վանդիեն առաջարկել է պակասը լրացնել անօդաչու տեխնոլոգիաների լայն կիրառմամբ՝ հատկապես ռազմավարական նշանակություն ունեցող ծովային նեղուցների հսկման գործում։ Միևնույն ժամանակ նշվում է, որ դաշինքի ներսում շարունակվում են քննարկումները պաշտպանական կարողությունների ամրապնդման ուղղությամբ։