Մակրոնը կոչ է արել ԱՄՆ-ին պահպանել համաձայնագրերը և չեղարկել ԵՄ-ի նկատմամբ մաքսատուրքերը

Եվրամիությունը հավատարիմ է նախկինում ստորագրված համաձայնագրերին, բայց պատրաստ է արձագանքել Միացյալ Նահանգների կողմից սահմանված նոր մաքսատուրքերին։ Այս մասին հայտարարել է Ֆրանսիայի նախագահ Էմանուել Մակրոնը ՀՀ վարչապետ Նիկոլ Փաշինյանի հետ հանդիպումից հետո կայացած մամուլի ասուլիսում։

«Մենք պաշտպանում ենք ազատ և արդար առևտուրը և Առևտրի համաշխարհային կազմակերպության կանոններին հետևելը։ Ստորագրվել են համաձայնագրեր, որոնք պետք է հարգվեն, և եթե դրանք կասկածի տակ դրվեն, դա կհանգեցնի ամեն ինչի վերանայման։ Եթե որևէ երկրի սպառնում են մաքսատուրքերով, ԵՄ-ն ունի գործիքներ, որոնք պետք է օգտագործվեն նման դեպքում», - ասել է Մակրոնը՝ մեկնաբանելով ԱՄՆ նախագահ Դոնալդ Թրամփի կողմից եվրոպական ավտոարտադրանքի վրա 25% մաքսատուրք սահմանելու որոշումը։

Ֆրանսիայի առաջնորդը հավելել է, որ իր կարծիքով, ներկայիս աշխարհաքաղաքական շրջանում ԱՄՆ-ն և ԵՄ-ն «ավելի կարևոր անելիքներ ունեն, քան անկայունության սպառնալիքները»։ Նա նաև հույս է հայտնել, որ «առողջ բանականությունը հնարավորինս շուտ կհաղթի» և գործընկերների միջև ներդաշնակ համագործակցությունը կվերականգնվի։