Ռուսաստանը մեղադրում է Ուկրաինային՝ հրադադարի նախօրեին սադրանք կազմակերպելու մեջ

Ռուսաստանի Դաշնության խորհրդի միջազգային հարցերի հանձնաժողովի նախագահի առաջին տեղակալ Վլադիմիր Ջաբարովը հայտարարել է, որ եթե Մոսկվայի կողմից մայիսի 8-9-ին հայտարարված հրադադարը խախտվի, ապա ռուսական բանակի պատասխանը կլինի «անխնա»։ Նրա խոսքով՝ Ուկրաինան փորձում է սադրանքների միջոցով խաթարել հրադադարի նախաձեռնությունը, գրում է «Лента.ру»-ն։

Ավելի վաղ հաղորդվել էր, որ Ուկրաինայի նախագահ Վլադիմիր Զելենսկին հայտարարել է հրադադար՝ մայիսի 6-ի կեսգիշերից սկսած։ Ռուսաստանը պաշտոնապես չէր արձագանքել այդ նախաձեռնությանը, սակայն հետագայում հայտարարեց իր սեփական հրադադարի մասին՝ նվիրված Հաղթանակի օրվան՝ մայիսի 8-9-ին։ Ջաբարովը նշել է, որ մայիսի 6-ը Ռուսաստանի համար որևէ խորհրդանշական նշանակություն չունի, սակայն, ըստ նրա, նույնիսկ այդ դեպքում Ուկրաինան դիմել է «ահաբեկչական մեթոդների»։

Ռուսաստանցի սենատորի պնդմամբ՝ հրադադարի նախօրեին Ուկրաինայի զինված ուժերը հարված են հասցրել Ղրիմի Ջանկոյ քաղաքին, որի հետևանքով զոհվել է հինգ մարդ։ Ղրիմի ղեկավար Սերգեյ Ակսյոնովը հաստատել է նաև անօդաչու թռչող սարքերի հարձակումը տարածաշրջանի վրա։ Ջաբարովը համոզված է, որ այս գործողությունները նպատակ ունեին հրահրել Ռուսաստանին՝ խափանելու հրադադարը։