Հանբարձում Մաթևոսյանը Իվանա Ժիվկովիչի հետ քննարկել է COP17-ի առաջնահերթությունները

ՀՀ շրջակա միջավայրի նախարար Հանբարձում Մաթևոսյանը Երևանի երկխոսության շրջանակում հանդիպում է ունեցել ՄԱԿ-ի գլխավոր քարտուղարի օգնական, ՄԱԶԾ Եվրոպայի և ԱՊՀ երկրների տարածաշրջանային բյուրոյի տնօրեն Իվանա Ժիվկովիչի հետ։

Հանդիպման ընթացքում քննարկվել են Կենսաբազմազանության մասին կոնվենցիայի COP17 համաժողովի նախապատրաստական աշխատանքները, օրակարգային առաջնահերթությունները, ինչպես նաև Հայաստանի նախագահության շրջանակում երկրի տեսլականն ու անելիքները։

Նախարարը ներկայացրել է Հայաստանի երեք հիմնական առաջնահերթությունները՝ որպես COP17-ի նախագահող երկիր։ Առաջինը՝ Կունմին-Մոնրեալի գլոբալ կենսաբազմազանության շրջանակի իրականացման առաջին համապարփակ վերանայման ապահովումն է՝ շեշտադրելով հաշվետվողականությունն ու գործնական առաջընթացը։ Երկրորդը՝ կենսաբազմազանության ֆինանսավորման ընդլայնումն է՝ մինչև 2030 թվականը տարեկան 30 միլիարդ ԱՄՆ դոլարի մոբիլիզացիայի նպատակով։ Երրորդը՝ բազմակողմ բնապահպանական գործընթացների միջև համադրության և փոխլրացման ուժեղացումն է։

Հանդիպման ընթացքում Հանբարձում Մաթևոսյանը կարևորել է նաև ՄԱԶԾ-ի դերակատարումը կենսաբազմազանության պահպանության, բնապահպանական քաղաքականությունների իրականացման, ինչպես նաև ոլորտային համագործակցության խորացման գործում։ Քննարկվել են COP17-ին ընդառաջ համատեղ նախաձեռնությունների և ծրագրերի իրականացման հնարավորությունները, այդ թվում՝ կենսաբազմազանության ֆինանսավորման, բնահեն լուծումների և համայնքային ծրագրերի ուղղությամբ։

Կողմերն անդրադարձել են նաև ՄԱԶԾ-ի հետ արդեն իրականացվող համատեղ ծրագրերին, որոնք նախարարի գնահատմամբ արդյունավետ և կարևոր են՝ Հայաստանի բնապահպանական և կայուն զարգացման օրակարգի առաջմղման տեսանկյունից։

Հանդիպման ավարտին նախարարը վերահաստատել է Հայաստանի պատրաստակամությունը՝ շարունակելու սերտ համագործակցությունը ՄԱԶԾ-ի հետ՝ COP17-ը դարձնելու արդյունքահեն և գործնական քայլերի վրա հիմնված համաժողով։