Մարիա Զախարովան պատմել է՝ ինչպես է անցել իր հարսանիքը Նյու Յորքում

Ռուսաստանի ԱԳՆ պաշտոնական ներկայացուցիչ Մարիա Զախարովան բացահայտել է 2005 թվականին Նյու Յորքում տեղի ունեցած իր հարսանիքի մանրամասները։ Նրա խոսքերը փոխանցում է «РИА Новости»-ն։

Զախարովայի խոսքով՝ ապագա ամուսնու հետ ծանոթացել էր իր արտասահմանյան գործուղումից ընդամենը մեկ ամիս առաջ։ Դիվանագետը նշել է, որ չէր կարող չեղարկել ծառայողական պարտականությունները, այդ պատճառով էլ նրանք որոշել են ամուսնությունը գրանցել անմիջապես Նյու Յորքում՝ Ռուսաստանի հյուպատոսարանում։ «Սենյակում ընդամենը չորս հոգի էին՝ փոխհյուպատոսը, մենք երկուսով և Վլադիմիր Պուտինի լուսանկարը», — կատակել է Զախարովան։

ՌԴ ԱԳՆ ներկայացուցիչը նաև անդրադարձել է իր ընտանիքի շուրջ տարածվող լուրերին՝ ընդգծելով, որ ընտանիքի անդամներից ոչ ոք չունի այլ երկրի քաղաքացիություն՝ բացի ռուսականից։ Նրա խոսքով՝ այդ տեղեկությունները կեղծ են և արդեն ավելի քան վեց տարի շրջանառվում են համացանցում՝ չնայած պաշտոնական հերքումներին։