Կենսաբազմազանության գլոբալ ճգնաժամը արդեն իրական և խորացող մարտահրավեր է․ Մաթևոսյան

Շրջակա միջավայրի նախարար Համբարձում Մաթևոսյանը Երևանի երկխոսության շրջանակում մասնակցել է «Կենսաբազմազանության գլոբալ կառավարման ամրապնդումը ժամանակակից մարտահրավերների պայմաններում» խորագրով պանելային քննարկմանը և հանդես եկել բացման խոսքով։

Իր խոսքում նախարարը նշել է, որ կենսաբազմազանության գլոբալ ճգնաժամը արդեն իրական և խորացող մարտահրավեր է՝ ընդգծելով դրա փոխկապակցվածությունը կլիմայի փոփոխության և կայուն զարգացման օրակարգի հետ։ Նա կարևորել է Կունմինգ–Մոնրեալի գլոբալ շրջանակի ընդունումը՝ միաժամանակ շեշտելով, որ անհրաժեշտ է անցնել կոնկրետ գործողությունների և փակել պարտավորությունների ու իրականացման միջև եղած բացը։

Համբարձում Մաթևոսյանը ընդգծել է, որ Հայաստանը, որպես COP17-ի նախագահող երկիր, հանձնառու է առաջ մղելու կիրառելի և արդյունքահեն օրակարգ՝ նպատակ ունենալով արագացնել առաջընթացը մինչև 2030 թվականը։ Նա անդրադարձել է նաև կենսաբազմազանության ինտեգրմանը ազգային քաղաքականություններում, նորարարությունների կիրառմանն ու բոլոր շահագրգիռ կողմերի ներգրավվածության կարևորությանը։

Եզրափակելով՝ նախարարը նշել է, որ Երևանի երկխոսությունը կարևոր հարթակ է համատեղ լուծումների ձևավորման և միջազգային համագործակցության ամրապնդման համար՝ հանուն բնության պահպանության և կայուն ապագայի։