Ռուսաստանի նավթագազային եկամուտները կտրուկ նվազել են

Ռուսաստանի դաշնային բյուջեի նավթագազային եկամուտները 2026 թվականի ապրիլին կազմել են 855,6 միլիարդ ռուբլի։ Այս մասին հայտնել է Ռուսաստանի ֆինանսների նախարարությունը՝ հրապարակելով ամսական վիճակագրությունը։

Չնայած մարտ ամսվա համեմատ եկամուտներն աճել են ավելի քան 238 միլիարդ ռուբլով, տարեկան կտրվածքով գրանցվել է զգալի անկում։ Նախորդ տարվա նույն ժամանակահատվածի համեմատ նավթագազային եկամուտները նվազել են շուրջ 230 միլիարդ ռուբլով։ Միևնույն ժամանակ ապրիլը դարձել է առաջին ամիսը տարվա սկզբից, երբ փաստացի արդյունքը գերազանցել է բազային կանխատեսումները։

Ռուսաստանի ֆինանսների նախարարության տվյալներով՝ նավթի համաշխարհային գների աճը, որը պայմանավորված է Մերձավոր Արևելքում լարվածությամբ և Հորմուզի նեղուցի խնդիրներով, մասամբ օգնել է բյուջեին։ Սակայն ռուսական նավթային արտահանման վրա շարունակում են ազդել ենթակառուցվածքների դեմ հարձակումները, լոգիստիկ դժվարությունները և ապահովագրական ծախսերի աճը, ինչի հետևանքով Մոսկվան չի կարողանում ամբողջությամբ օգտվել բարձր գներից։