Գիտնականները հայտնաբերել են ինսուլտի ոչ ակնհայտ ռիսկային գործոն

Եվրոպացի գիտնականները հայտարարել են, որ ինչպես չափազանց ցածր, այնպես էլ չափազանց բարձր սրտի զարկերը հանգստի վիճակում կարող են մեծացնել ինսուլտի վտանգը։ Հետազոտության արդյունքները ներկայացվել են European Stroke Organisation Conference գիտաժողովում։

Գիտնականները վերլուծել են UK Biobank նախագծի ավելի քան 460 հազար մարդու տվյալներ՝ նրանց առողջական վիճակին հետևելով շուրջ 14 տարի։ Այդ ընթացքում արձանագրվել է ավելի քան 12 հազար ինսուլտ։ Պարզվել է, որ ամենացածր ռիսկը նկատվել է այն մարդկանց մոտ, որոնց սրտի զարկերի հաճախականությունը կազմել է 60-69 զարկ րոպեում։ Իսկ եթե պուլսը եղել է 50-ից ցածր կամ 90-ից բարձր, ինսուլտի հավանականությունը զգալիորեն աճել է։

Հետազոտողների տվյալներով՝ ցածր պուլսի դեպքում ռիսկն աճել է 25 տոկոսով, իսկ բարձր պուլսի դեպքում՝ 45 տոկոսով։ Գիտնականները կարծում են, որ չափազանց ցածր սրտի աշխատանքը կարող է նվազեցնել ուղեղի արյան մատակարարումը, մինչդեռ բարձր պուլսը մեծացնում է ծանրաբեռնվածությունը անոթների վրա։ Նրանք ընդգծել են, որ սրտի զարկերի հաճախականությունը կարևոր ցուցանիշ է, որին պետք է ավելի մեծ ուշադրություն դարձնել սրտանոթային հիվանդությունների ռիսկը գնահատելիս։