Բժիշկները զգուշացնում են՝ խռմփոցը կարող է վտանգավոր լինել առողջության համար

Խռմփոցը կարող է հանգեցնել լուրջ առողջական խնդիրների, այդ թվում՝ հիշողության խանգարումների և սրտանոթային հիվանդությունների։ Այս մասին «Лента.ру»-ի հետ զրույցում հայտարարել է քիթ-կոկորդ-ականջաբան Դարյա Խարինան։

Բժշկի խոսքով՝ խռմփոցը առաջին հերթին խախտում է քնի որակը։ Նույնիսկ եթե մարդը քնում է անհրաժեշտ 7-8 ժամը, նա կարող է առավոտյան զգալ հոգնածություն և քնկոտություն։ Առավել վտանգավոր է քնի ընթացքում առաջացող ապնոէն՝ շնչառության կարճատև կանգերը, որոնք օրգանիզմում առաջացնում են թթվածնի պակաս։

Մասնագետը նշել է, որ ապնոէի հետևանքով կարող են առաջանալ հիշողության խնդիրներ, կենտրոնացման անկում, դյուրագրգռություն, ինչպես նաև բարձրանում է ճարպակալման, շաքարային դիաբետի, ինսուլտի և ինֆարկտի վտանգը։ Բժիշկը նաև զգուշացրել է, որ շնչառության երկարատև կանգերը կարող են նույնիսկ կյանքին սպառնացող հետևանքներ ունենալ։