Փորձագետը քննադատել է Մակրոնի և Փաշինյանի ջերմ հրաժեշտը Երևանում

Էթիկետի մասնագետ Ալբինա Խոլգովան հայտարարել է, որ Ֆրանսիայի նախագահ Մակրոնի և Հայաստանի վարչապետ Նիկոլ Փաշինյանի ցուցադրական ջերմ հրաժեշտը չի համապատասխանում բարձր մակարդակի քաղաքական գործիչների վարքականոնին։ Նրա խոսքերը հրապարակել է «Лента.ру»-ն։

Խոսքը վերաբերում է Մակրոնի՝ Երևան կատարած այցից հետո տարածված կադրերին, որտեղ երկու առաջնորդները երկար գրկախառնվում են և միմյանց «սրտիկ» ժեստեր ցույց տալիս։ Խոլգովայի խոսքով՝ գործնական էթիկետում գործընկերների միջև ֆիզիկական շփումը, բացի ձեռքսեղմումից, համարվում է անցանկալի։

Փորձագետը նշել է, որ քաղաքական առաջնորդների դեպքում նման վարքագիծը հատկապես տեսախցիկների ներկայությամբ ցանկալի չէ, քանի որ նրանց հետևում է ամբողջ աշխարհը։ Նա ընդգծել է, որ բարձր մակարդակի պաշտոնյաների համար բավարար են ձեռքսեղմումը, ժպիտն ու զուսպ վերաբերմունքը։ Ավելի վաղ Մակրոնը Երևանում նաև կատարել էր Շառլ Ազնավուրի «Բոհեմա» երգը՝ Նիկոլ Փաշինյանի ուղեկցությամբ։