Քննարկվել է «Բարձրագույն կրթության և գիտության մասին» օրենքի փոփոխության նախագիծը (տեսանյութ)

ԱԺ հերթական նիստում այսօր երկրորդ ընթերցմամբ քննարկվել է «Բարձրագույն կրթության և գիտության մասին» օրենքում փոփոխություններ և լրացումներ կատարելու մասին օրենքի նախագիծը։ Հիմնական զեկուցող ԿԳՄՍ նախարար Ժաննա Անդրեասյանի խոսքով՝ փոփոխությունները միտված են վերոնշյալ օրենքի կիրարկման ընթացքին, մասնավորապես՝ անցումային ժամանակաշրջանում մի շարք կարգավորումների հստակեցմանը։ Նրա խոսքով՝ դրանք թույլ կտան ապահովել բարձրագույն կրթության և գիտության համակարգի սահուն անցումը դեպի նոր իրողություն, քանի որ նոր օրենքը սահմանում է ինստիտուցիոնալ նոր շրջանակ և ենթադրում է լայնածավալ բարեփոխումներ։

«Անցումային փուլում անհրաժեշտ հստակեցումները կօգնեն, որպեսզի բարեփոխումների գործընթացն ավելի կարգավորված լինի»,- նշել է Ժաննա Անդրեասյանը։

ԿԳՄՍ նախարարը նշել է՝ առաջինից երկրորդ ընթերցման ընթացքում որոշ դրույթներ լրամշակվել են պատգամավորական առաջարկների հիման վրա։ Խոսքը, մասնավորապես, վերաբերում է Գիտությունների ազգային ակադեմիային առնչվող դրույթներին, որոնք հստակեցնում են ակադեմիայի գործունեության պայմանները՝ հաշվի առնելով նախագահության գործունեության, ակադեմիկոսների անդամության և այլ հանգամանքներ։

«Նախարարությունը սերտորեն համագործակցում է ակադեմիայի գործընկերների հետ, և օրենսդրական այս կարգավորումներից անմիջապես հետո նախատեսվում է Կառավարության քննարկմանը ներկայացնել համապատասխան ենթաօրենսդրական կարգավորումները։ Դրանք հնարավորություն կտան ակադեմիայում կազմակերպել նոր ընտրություններ, ձևավորել և համալրել նախագահության թափուր տեղերը, ինչպես նաև ստեղծել ակադեմիայի գործունեության նոր պայմաններ»,- ասել է Ժաննա Անդրեասյանը։

Նա նաև նշել՝ սա հատկապես կարևոր է՝ հաշվի առնելով, որ նոր օրենքով ակադեմիայի գործառույթներն ու նշանակությունը առավել ընդգծվում և կարևորվում են հանրային-պետական կյանքում։

Ժաննա Անդրեասյանը նշել է՝ որոշ հստակեցումներ են արվել նաև մի քանի այլ դրույթներում՝ հիմնականում բուհերի հետ խորհրդակցությունների արդյունքում։