Կայացել է Համբարձում Մաթևոսյանի և Պեդրո Մորենոյի հանդիպումը՝ տնտեսական և բնապահպանական օրակարգով

ՀՀ շրջակա միջավայրի նախարար Համբարձում Մաթևոսյանը հանդիպել է ՄԱԿ-ի Առևտրի և զարգացման համաժողովի (UNCTAD) գլխավոր քարտուղարի պաշտոնակատար Պեդրո Մորենոյի հետ։ Հանդիպմանը մասնակցել է նաև Շվեյցարիայի Համադաշնությունում Հայաստանի Հանրապետության արտակարգ և լիազոր դեսպան Հասմիկ Տոլմաջյանը։

Հանդիպման ընթացքում կողմերը քննարկել են առևտրի, տնտեսական զարգացման և կենսաբազմազանության պահպանության փոխկապակցվածությանը վերաբերող հարցեր, ինչպես նաև COP17-ի շրջանակում համագործակցության հնարավորությունները։ Նախարարը կարևորել է տնտեսական զարգացման և շրջակա միջավայրի պահպանության միջև հավասարակշռված քաղաքականությունների իրականացումը՝ ընդգծելով, որ կենսաբազմազանության կորուստը լուրջ ազդեցություն ունի տնտեսական կայունության, մատակարարման շղթաների և առևտրի վրա։

Անդրադարձ է կատարվել նաև բնապահպանական բաղադրիչները առևտրային քաղաքականություններում առավել համակարգված ներառելու անհրաժեշտությանը։ Համբարձում Մաթևոսյանը ներկայացրել է COP17-ի առաջնահերթությունները՝ Կունմինգ-Մոնրեալի կենսաբազմազանության գլոբալ շրջանակի իրականացման արագացում, կայուն արտադրության և սպառման խթանում, մասնավոր հատվածի ներգրավվածության մեծացում և բնապահպանական ֆինանսավորման նոր մեխանիզմների զարգացում։ Այս համատեքստում նա ընդգծել է UNCTAD-ի ներգրավվածության կարևորությունը՝ տեխնիկական աջակցության, համատեղ նախաձեռնությունների և քաղաքական առաջարկությունների մշակման ուղղությամբ։

Կողմերը պայմանավորվել են շարունակել աշխատանքային երկխոսությունը, ինչպես նաև դիտարկել COP17-ի շրջանակում համատեղ միջոցառումների և տեխնիկական աջակցության ծրագրերի իրականացման հնարավորությունները։