Մասնագետները նշել են՝ ինչպես արագացնել դանդաղ աշխատող հեռուստացույցը

Տեխնոլոգիական MakeUseOf պարբերականը հայտարարել է, որ հեռուստացույցի աշխատանքի դանդաղման ամենատարածված պատճառներից մեկը գերբեռնված քեշ-հիշողությունն է։ Պարբերականի լրագրող Պանկիլ Շահի խոսքով՝ նույնիսկ ամենաթանկ և ժամանակակից Smart TV-ները ժամանակի ընթացքում կարող են սկսել դանդաղ աշխատել։

Մասնագետը բացատրել է, որ քեշը ժամանակավոր ֆայլերի պահոց է, որը կուտակվում է ինչպես համակարգի, այնպես էլ հավելվածների աշխատանքի ընթացքում։ Ամենաշատ հիշողությունը սովորաբար զբաղեցնում են վիդեոհոսքային ծառայությունները և օնլայն կինոթատրոնները, քանի որ դրանք նախապես բեռնում են տեսանյութերը՝ ավելի սահուն ցուցադրության համար։

MakeUseOf-ը խորհուրդ է տալիս պարբերաբար մաքրել հեռուստացույցի քեշը՝ մտնելով կարգավորումների բաժին, ընտրելով հիշողության կամ պահեստի կարգավորումները և զրոյացնելով քեշ-հիշողությունը։ Քեշը հնարավոր է մաքրել նաև առանձին հավելվածների կարգավորումներից։ Հոդվածում ընդգծվում է, որ քեշի մաքրումը չի ջնջում կարևոր տվյալները և չի պահանջում նորից մուտք գործել հավելվածներ։