Դեռահասները ծեծելով սպանել են ընկերոջը պաշտպանելու եկած տղամարդուն

Ռուսաստանի Չելյաբինսկ քաղաքում 14-ից 16 տարեկան երեք դեռահասներ դաժան ծեծի են ենթարկել 31-ամյա տղամարդու, որը ավելի ուշ մահացել է ստացած վնասվածքներից։ Դեպքի մասին հայտնում է «74.ru»-ն։

Նախնական տվյալներով՝ հակամարտությունը սկսվել էր դեռահասների և զոհի ընկերոջ միջև՝ աղջկա հասցեին հնչած վիրավորական խոսքերի պատճառով։ Կողմերը պայմանավորվել էին հանդիպել՝ հարցը պարզելու համար, սակայն տղամարդու ընկերը հանդիպմանը չէր եկել և նրա փոխարեն այնտեղ էր գնացել 31-ամյա ծանոթը։

Հրապարակման համաձայն՝ դեռահասները տղամարդուն դաժանորեն ծեծել են ձեռքերով և ոտքերով։ Ստացած վնասվածքները կյանքի հետ անհամատեղելի են եղել։ Քրեական գործի շրջանակում ամենափոքր մասնակիցը տնային կալանքի տակ է, իսկ մյուս երկուսը սպասում են դատավարությանը կալանավայրում։