Համբարձում Մաթևոսյանը և Կավեհ Զահեդին անդրադարձել են COP17-ի նախապատրաստական գործընթացներին

ՀՀ շրջակա միջավայրի նախարար Համբարձում Մաթևոսյանը Երևանի երկխոսության շրջանակում հանդիպել է Պարենի և գյուղատնտեսության կազմակերպության (ՊԳԿ/FAO) Կլիմայի փոփոխության, կենսաբազմազանության և շրջակա միջավայրի գրասենյակի տնօրեն Կավեհ Զահեդիի հետ։

Հանդիպման ընթացքում քննարկվել են Հայաստան–ՊԳԿ համագործակցության ընթացիկ օրակարգն ու դրա ընդլայնման հնարավորությունները՝ հատկապես COP17-ի նախապատրաստական գործընթացների համատեքստում։ Նախարարը ընդգծել է, որ բարձր է գնահատում ՊԳԿ շարունակական աջակցությունը՝ գյուղատնտեսական արտադրողականության բարձրացման, սննդային անվտանգության ամրապնդման, ինչպես նաև ոլորտային քաղաքական և ինստիտուցիոնալ շրջանակների կատարելագործման ուղղությամբ իրականացվող ծրագրերի շրջանակում։

Կողմերն անդրադարձել են նաև գյուղատնտեսության և կենսաբազմազանության միջև առկա սերտ փոխկապակցվածությանը՝ կարևորելով բնական ռեսուրսների կայուն կառավարման և էկոհամակարգերի պահպանության նշանակությունը։

Համբարձում Մաթևոսյանը նշել է նաև, որ վերջերս ստորագրվել է «Աջակցություն Հայաստանում անտառների ազգային մոնիթորինգի և գնահատման համակարգի ստեղծմանը» ծրագրի պայմանագիրը, որը կարևոր քայլ է անտառային ռեսուրսների արդյունավետ կառավարման և տվյալահեն քաղաքականությունների մշակման ուղղությամբ։

Նախարարը վստահություն է հայտնել, որ առաջիկա COP17 համաժողովը լավ հնարավորություն է համատեղ ձևավորելու գործնական և արդյունքահեն նախաձեռնություններ՝ ուղղված կենսաբազմազանության պահպանության և կլիմայական մարտահրավերների հաղթահարման նպատակներին։

Նրա խոսքով՝ COP17-ը կարևոր հարթակ կլինի միջազգային գործընկերների հետ համագործակցությունն առավել գործնական դարձնելու և կենսաբազմազանության պահպանության ուղղությամբ նոր նախաձեռնություններ ձևավորելու համար։