Apple-ը կարող է միավորվել Intel-ի և Samsung-ի հետ

Apple-ը բանակցություններ է վարում Intel-ի և Samsung-ի հետ՝ ԱՄՆ-ում պրոցեսորների արտադրություն կազմակերպելու շուրջ։ Այս մասին հայտնում է «Bloomberg»-ը՝ հղում անելով իր աղբյուրներին։

Եթե կողմերը համաձայնության հասնեն, Intel-ն ու Samsung-ը կարող են սկսել Apple-ի սարքերի համար նախատեսված չիպերի արտադրությունը ամերիկյան գործարաններում։ Ներկայում Apple-ի բոլոր հիմնական պրոցեսորները արտադրում է թայվանական TSMC ընկերությունը, սակայն Կուպերտինոյում ցանկանում են ունենալ նաև պահեստային մատակարարներ։

Bloomberg-ի տվյալներով՝ Apple-ը փորձում է նաև ամրապնդել հարաբերությունները ԱՄՆ նախագահ Թրամփի վարչակազմի հետ՝ ավելացնելով արտադրությունը հենց ԱՄՆ տարածքում։ Հոդվածում նշվում է, որ Apple-ը ավանդաբար նախընտրում է յուրաքանչյուր կարևոր բաղադրիչի համար ունենալ առնվազն երկու մատակարար՝ ինչպես գների վերահսկման, այնպես էլ հնարավոր խնդիրներից խուսափելու համար։ Սակայն ընկերությունում միաժամանակ մտահոգված են Intel-ի և Samsung-ի տեխնոլոգիական հնարավորություններով, քանի որ դրանք տարբերվում են TSMC-ի օգտագործած մեթոդներից։