Ռուսաստանում 27 տարի անց դատավճիռ է կայացվել լեգենդար քաղաքապետի դեմ մահափորձի գործով

Մոսկվայի մարզի Օդինցովոյի դատարանը 11 տարվա ազատազրկման է դատապարտել Կիլյուշիկ ազգանունով տղամարդուն, որը մեղավոր է ճանաչվել Նիժնևարտովսկի նախկին քաղաքապետ Յուրի Տիմոշկովի դեմ 1998 թվականին իրականացված մահափորձերի գործով։ Այս մասին հայտնել են Մոսկվայի մարզի դատարանների մամուլի ծառայությունից։

Քննության տվյալներով՝ դատապարտյալը եղել է ուժային կառույցների նախկին աշխատակիցներից կազմված հանցավոր խմբի անդամ և հանդես է եկել որպես միջնորդ պատվիրատուների ու կատարողների միջև։ Բացի քաղաքապետի դեմ մահափորձերից, նրան մեղադրում են նաև 2000 և 2001 թվականներին տեղի ունեցած այլ ծանր հանցագործությունների մեջ։

Յուրի Տիմոշկովը համարվում էր Նիժնևարտովսկի լեգենդար ղեկավարներից մեկը։ 1998 թվականին նրա դեմ իրականացվել էր երկու մահափորձ՝ սկզբում նրան ծեծի էին ենթարկել շենքի մուտքում, իսկ մի քանի ամիս անց պայթեցրել էին ծառայողական «Վոլգա» մեքենան։ Գործը երկար տարիներ մնացել էր չբացահայտված և նորից քննության էր վերցվել միայն 2025 թվականին։