Զբոսաշրջիկների վրա ամենամեծ տպավորությունը թողնում են մարդիկ. վարչապետ

ՀՀ վարչապետ Նիկոլ Փաշինյանն անդրադարձել է զբոսաշրջության բնագավառի ցուցանիշներին՝ նշելով. «Մենք զբոսաշրջային բում ունենք, որը շարունակվելու և աճելու է։ Դրա համար կան բոլոր նախադրյալները»։

Ըստ նրա՝ «Այս ամենը դրամական հոսքեր են, և մեր հարգելի գործարարները պետք է ջանք գործադրեն, որ այդ հոսքերից ճիշտ ու արդար մասնաբաժինը ստանան»։

Վարչապետը նշել է, որ երբ զբոսաշրջիկներից հետաքրքրվել է, թե Հայաստանում ամենաշատն ինչից են տպավորված, 90 և ավելի տոկոսը պատասխանել է՝ մարդկանցից։ «Ամենամեծ տպավորությունը թողնում են մարդիկ, նրանց ջերմությունը, հյուրասիրությունը և այսպես շարունակ։ Իհարկե, ճանապարհները, հուշարձանների պահպանությունը շատ կարևոր են, բայց սա ամենամեծ կապիտալն է, որ ՀՀ-ն ունի»,- ասել է նա։

Ըստ վարչապետի՝ սա մեծ կապիտալ է, որը հնարավոր է՝ անգամ տասնյակ միլիարդների ներդրմամբ հնարավոր չլիներ ստանալ. «Այլ բան է, թե մենք կարո՞ղ ենք այն դարձնել բարեկեցություն հենց իրենց՝ մարդկանց համար։ Եվ մեր ռազմավարությունները հենց դրա վրա են հիմնված»։ Ըստ Փաշինյանի՝ նման մարդիկ պետք է լավ ապրեն, խաղաղ ապրեն, երջանիկ ապրեն։