Զախարովան զգուշացրել է Կիևին․ Ռուսաստանը սպառնում է «զանգվածային հրթիռային հարվածով»

Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Կիևը կարող է ենթարկվել զանգվածային հրթիռային հարվածի, եթե Ուկրաինայի իշխանությունները փորձեն խափանել մայիսի 9-ի տոնական միջոցառումները։ Նրա հայտարարությունը հնչել է ռուսական լրատվամիջոցների հետ ճեպազրույցի ընթացքում։

Զախարովայի խոսքով՝ եթե Ուկրաինայի նախագահ Վլադիմիր Զելենսկու վարչակազմը իրականացնի իր «հանցավոր ծրագրերը»՝ ուղղված Հայրենական մեծ պատերազմի հաղթանակի 81-ամյակին նվիրված միջոցառումների խափանմանը, ապա Ռուսաստանը կարող է պատասխանել լայնածավալ հրթիռային հարվածներով։ Ռուս դիվանագետը նաև կոչ է արել Կիևում գտնվող քաղաքացիներին և օտարերկրյա դիվանագիտական ներկայացուցիչներին լրջորեն վերաբերվել Ռուսաստանի պաշտպանության նախարարության նախազգուշացումներին և ժամանակին լքել Ուկրաինայի մայրաքաղաքը։

Բացի այդ, Զախարովան հայտարարել է, որ Ուկրաինայի նախագահը մայիսի 5-6-ի ընթացքում հրադադարի հրաման չի տվել, իսկ Կիևի հայտարարությունները «լռության ռեժիմի» մասին, ըստ նրա, պայմանավորված են ռուսական բանակից նախաձեռնությունը խլելու փորձերով։