Ատամները լվանալու տարածված սխալը, որը կարող է վնասել ատամների առողջությանը

Ատամի մածուկի չափից շատ օգտագործումը կարող է նվազեցնել ատամների մաքրման արդյունավետությունն ու վնասել բերանի խոռոչի առողջությանը։ Այս մասին «Лента.ру»-ի հետ զրույցում հայտարարել է ստոմատոլոգ, բժշկական գիտությունների թեկնածու Յանա Դյաչկովան։

Բժշկի խոսքով՝ երբ մարդը չափազանց շատ մածուկ է օգտագործում, բերանում արագ առաջանում է մեծ քանակությամբ փրփուր, ինչի հետևանքով ստեղծվում է կեղծ զգացողություն, թե ատամներն արդեն մաքուր են։ Արդյունքում շատերը կրճատում են ատամները լվանալու ժամանակը, մինչդեռ ատամնափառի հեռացման հիմնական գործոնը խոզանակի մեխանիկական աշխատանքն է։ Եթե մաքրումը տևում է նախատեսված երկու րոպեից քիչ, հիգիենայի որակը զգալիորեն վատանում է։

Դյաչկովան նաև նշել է, որ հատկապես երեխաների դեպքում ֆտոր պարունակող մածուկների ավելցուկը կարող է հանգեցնել ֆլյուորոզի՝ ատամների էմալի կառուցվածքային փոփոխության, որի հետևանքով ատամների վրա կարող են առաջանալ սպիտակ կամ գունավորված բծեր։ Բացի այդ, ժամանակակից մածուկներում առկա փրփրացնող և սպիտակեցնող բաղադրիչների ավելցուկը զգայուն լորձաթաղանթ ունեցող մարդկանց մոտ կարող է առաջացնել այրոցի կամ անհարմարության զգացում։