Մեդվեդևը Ուկրաինային համեմատել է 1990-ականների Իրաքի հետ

Ռուսաստանի Անվտանգության խորհրդի փոխնախագահ Դմիտրի Մեդվեդևը հայտարարել է, որ Ուկրաինայի ներկայիս իշխանությունները կարող են կրկնել 1990-ականների Իրաքի ղեկավարության ճակատագիրը։ Նրա կարծիքով՝ Կիևի քաղաքականությունն ու ռազմական հավակնությունները զարգանում են նույն սցենարով, ինչ ժամանակին Սադամ Հուսեյնի վարչակարգի դեպքում։

RT-ում հրապարակված իր հոդվածում Մեդվեդևը անդրադարձել է Ուկրաինայի նախագահ Վլադիմիր Զելենսկու հայտարարությանը, ըստ որի՝ ուկրաինական բանակն ունի «եվրոպական բանակների մեջ ամենահարուստ մարտական փորձը»։ Ռուս պաշտոնյան հիշեցրել է, որ 1980-ականների վերջում նման գնահատականներ էին տրվում նաև Իրաքի բանակին, ինչը, ըստ նրա, հետագայում հանգեցրեց ծանր հետևանքների։

Մեդվեդևի խոսքով՝ Արևմուտքի կողմից խրախուսվող «հավակնություններն ու հաջողություններից գլխապտույտը» 1990 թվականին Իրաքին տարան աղետալի ճանապարհով, և Կիևի իշխանություններն այսօր ունեն նույն ուղին կրկնելու բոլոր հնարավորությունները։ Ավելի վաղ ռուս քաղաքական գործիչը նաև հայտարարել էր, որ Լեհաստանը կարող է դառնալ կամ Գերմանիայի վասալ, կամ Ռուսաստանի գործընկեր։