Բժիշկը նշել է՝ օրական քանի միզարձակումն է համարվում նորմալ

Ուրոլոգ Համիդ Աբբուդին պատմել է, թե օրական քանի անգամ միզարձակվելը կարելի է համարել առողջ ցուցանիշ։ Metro-ի հետ զրույցում բժիշկը նշել է, որ մեծահասակների համար բնական է օրական վեցից ինը անգամ միզարձակվելը։

Նրա խոսքով՝ 60 տարեկանից հետո այդ ցուցանիշը կարող է հասնել մինչև օրական 10 անգամի։ Աբբուդին բացատրել է, որ տարիքի հետ երիկամների աշխատանքը թուլանում է, իսկ միզապարկի մկանները կորցնում են իրենց նախկին ամրությունը։ Բացի այդ, տարեց մարդիկ հաճախ ընդունում են միզամուղ ազդեցություն ունեցող դեղամիջոցներ, որոնք նույնպես կարող են ազդել միզարձակման հաճախականության վրա։ Բժիշկը նաև նշել է, որ տղամարդկանց մոտ տարիքի հետ շագանակագեղձի մեծացումը կարող է ճնշում գործադրել միզապարկի վրա և ավելի հաճախակի միզարձակման պատճառ դառնալ։

Ուրոլոգը զգուշացրել է, որ չափազանց հաճախ միզարձակումը երբեմն կարող է կապված լինել տարբեր հիվանդությունների հետ։ Այդ խնդիրների թվում նա առանձնացրել է միզուղիների վարակները, շագանակագեղձի կամ միզապարկի քաղցկեղը, ցրված սկլերոզն ու ինսուլտը։ Ավելի վաղ բժիշկները նաև հայտնել էին, որ երիկամներում քարերի ոչ ակնհայտ ախտանիշներից մեկը կարող է լինել գոտկատեղի մշտական ցավը։