Մահաբեր վիրուսի բռնկում զբոսաշրջային նավում․ տասնյակ ուղևորների որոնում են տարբեր երկրներում

Աշխարհի մի շարք երկրներ սկսել են որոնել այն ուղևորներին, որոնք լքել էին MV Hondius զբոսաշրջային նավը մինչև հանտավիրուսի բռնկման պաշտոնական հաստատումը։ Reuters-ի փոխանցմամբ՝ նավում արդեն գրանցվել է երեք մահ, իսկ ևս ութ մարդ, այդ թվում՝ Շվեյցարիայի քաղաքացի, ենթադրաբար վարակվել են վտանգավոր վիրուսով։

Հայտնի է, որ մահացածների թվում եղել են Նիդերլանդներից մի ամուսնական զույգ և Գերմանիայի քաղաքացի։ Նավը կանգ էր առել Սուրբ Հեղինե կղզում՝ Կաբո Վերդե ուղևորվելու ճանապարհին, որտեղ մոտ 40 ուղևոր իջել էր նավից՝ դեռ մինչև բռնկման մասին տեղեկությունների տարածումը։ Այժմ նրանցից շատերի գտնվելու վայրը անհայտ է։ Մահացած հոլանդացու կինը նույնպես լքել էր նավը, սակայն հետագայում հիվանդացել և մահացել է՝ դեռևս չհասնելով Նիդերլանդներ։ KLM ավիաընկերությունը հայտնել է, որ կնոջ առողջական վիճակը կտրուկ վատացել էր Յոհանեսբուրգից իրականացվող թռիչքի ժամանակ։

Առողջապահության համաշխարհային կազմակերպության տվյալներով՝ հիվանդների մոտ հայտնաբերվել է հանտավիրուսի անդյան շտամը, որը հազվադեպ դեպքերում կարող է փոխանցվել մարդուց մարդուն շատ սերտ շփման միջոցով։ Չնայած մասնագետները պնդում են, որ նման փոխանցումը չափազանց հազվադեպ է, տարբեր երկրների առողջապահական մարմիններ արդեն բարձր պատրաստվածության ռեժիմի են անցել։ MV Hondius նավը, որի վրա գտնվում է մոտ 150 մարդ, շաբաթ օրը պետք է հասնի Իսպանիայի Տեներիֆե կղզի, որտեղից օտարերկրյա ուղևորները կվերադարձվեն իրենց երկրներ, իսկ իսպանացի ուղևորները կտեղափոխվեն կարանտին։