Համբարձում Մաթևոսյանը և Կլոդ Գասկոնին քննարկել են կենսաբազմազանության պահպանության և բնապահպանական ֆինանսավորման հարցեր

 

Հանդիպման ընթացքում քննարկել են բնապահպանական քաղաքականության, կենսաբազմազանության պահպանության, բնապահպանական ֆինանսավորման և COP17 համաժողովի նախապատրաստական աշխատանքներին առնչվող մի շարք ռազմավարական հարցեր։

Անդրադարձել են GEF-ի աջակցությամբ Հայաստանում իրականացվող ծրագրերին՝ կենսաբազմազանության պահպանության, պահպանվող տարածքների կառավարման, հողերի կայուն օգտագործման, անտառների վերականգնման, կլիմայական փոփոխություններին հարմարվողականության և բնապահպանական կառավարման համակարգերի զարգացման ուղղություններով։

 

Հանդիպման ընթացքում անդրադարձել են նաև GEF-9 համալրման գործընթացին և Գլոբալ կենսաբազմազանության շրջանակային հիմնադրամի (GBFF) շրջանակում համագործակցության հնարավորություններին։ Նախարարը կարևորել է կենսաբազմազանության ֆինանսավորման բացերի կրճատման, ներդրումային նոր գործիքների կիրառման և պետական ու մասնավոր հատվածների համագործակցության ընդլայնման անհրաժեշտությունը։

Նախարարն ընդգծել է, որ Հայաստանը, որպես Կենսաբազմազանության մասին կոնվենցիայի COP17 համաժողովի նախագահող երկիր, կարևորում է Կունմինգ-Մոնրեալի գլոբալ կենսաբազմազանության շրջանակի գործնական իրականացումը և բնապահպանական ֆինանսավորման արդյունավետ մեխանիզմների ընդլայնումը։ Այս համատեքստում GEF-ը շարունակում է մնալ կենսաբազմազանության ոլորտում առանցքային ֆինանսական գործընկեր։

 

Նախարարը վերահաստատել է Հայաստանի պատրաստակամությունը՝ շարունակելու և խորացնելու համագործակցությունը GEF-ի հետ՝ կենսաբազմազանության պահպանության և բնապահպանական ֆինանսավորման ոլորտներում համատեղ նախաձեռնությունների արդյունավետ իրականացման ուղղությամբ։