Մեդվեդևը սպառնալիք է տեսնում Գերմանիայի հնարավոր միջուկային ծրագրում

Ռուսաստանի Անվտանգության խորհրդի փոխնախագահ Դմիտրի Մեդվեդևը հայտարարել է, որ եթե Գերմանիան ստանա միջուկային զենք, դա կդառնա միջազգային պարտավորությունների կոպիտ խախտում։ Նրա հոդվածը հրապարակվել է RT պարբերականում։

Մեդվեդևը հիշեցրել է գերմանական մամուլում հայտնված հրապարակումները, որոնց համաձայն՝ միջուկային զենքի ձեռքբերման դեպքում Գերմանիան կարող է վերածվել Ռուսաստանի հիմնական թիրախներից մեկի։ Ռուս քաղաքական գործչի խոսքով՝ նման քայլը կհակասի Միջուկային զենքի չտարածման մասին պայմանագրի երկրորդ հոդվածին, որը Գերմանիան ընդունել է 1968 թվականին։

Նա նաև հայտարարել է, որ «գերմանական միջուկային ծրագրի» հարցը պետք է անհապաղ քննարկվի միջազգային հանրության կողմից։ Մեդվեդևի կարծիքով՝ դա կարող է հանգեցնել ՄԱԳԱՏԷ-ի խստացված ստուգումների, ՄԱԿ Անվտանգության խորհրդի քննադատության և միջազգային սահմանափակումների կիրառման։ Ավելի վաղ նա հայտարարել էր նաև, որ Գերմանիայի վերամիավորումը 1990 թվականին տեղի է ունեցել առանց հանրաքվեի, ինչի պատճառով, ըստ նրա, ժամանակակից Գերմանիան չունի բավարար իրավական հիմք։